كان فيه مرة كلب.. اسمه.. والله ما أنا فاكر.. أول ما اتولد.. انقبض.. لقى الخلق ياما.. والناس ماشية فى الشوارع.. وناس راضية وناس نايمة وناس نفسها بس تهاجر.. سأل أبوه: واحد وواحد يبقوا كام.. قاله عند ناس اتنين وعند غيرهم تلاتة.. وعند التانيين واحد.. وعندنا صفر.. كله زى بعضه.. كله محصل بعضه.. الله جاب الله خد الله عليه العوض.. ماشين فى السوق.. يشتروا اشى اقلام واشر كراريس ومساطر..السؤال الأهم.. انشغل بيه.. إيه دول؟؟ دول أدواتك سلاحك عشان تحاول.. أهه يبقى فينا واحد حاول.. وتتعلم عربى وانجليزى وحساب.. ارتبك لأن الأمر عليه اتحبك.. واتعلم ليه الحساب.. ما دام واحد وواحد بقوا فى النهاية لاشئ.. بص له وقاله: هتوجع دماغى ليه.. عنك ما اتعلمت وعنك ما عرفت.. هو استسلم.. وده كان أول خطوة عشان يبقى زى كل كلاب الحارة.. راح المدرسة واجتهد وذاكر.. عمل اللى عليه.. لكن الظروف كانت مش ملك إيديه.. ومن غير ما نطول ولا نقصر.. كبر الكلب.. وشايل فى ايده شهادته.. مش هقولكوا دكتور.. صيدلى.. مدرس.. مهندس.. سمكرى عتال.. مش مهم.. قايم فى يوم الصبح.. بص لصورة أبوه.. الله يرحمه.. ماحدش فيها دايم.. قاله صحيح يابا.. واحد وواحد صفر.. لأ.. مش صفر.. صفرين.. ثلاثة.. أربعة أصفار.. ماعدتش تفرق.. قال ارمى نفسى من على كوبرى الجامعة ولا قدام قطر.. ولا أشرب سم.. عمل اللى كان فى دماغه.. إيه هو مالوش لزمة.. المهم النتيجة.. أهله شالوه.. كفنوه ودفنوه وكتبوا على قبره.. كان فيه مرة كلب.. اسمه ايه والله ما أنا فاكر.. أول ما اتولد........
ليست هناك تعليقات:
إرسال تعليق